ശ്രീരാജരാജേശ്വര്യഷ്ടകം

 

॥ ശ്രീരാജരാജേശ്വര്യഷ്ടകം ॥

॥ അഥ ശ്രീരാജരാജേശ്വര്യഷ്ടകം ॥

 

അംബാ ശാംഭവി ചന്ദ്രമൌലിരബലാഽപര്‍ണാ ഉമാ പാര്‍വതീ
കാലീ ഹൈമവതീ ശിവാ ത്രിനയനീ കാത്യായനീ ഭൈരവീ ।
സാവിത്രീ നവയൌവനാ ശുഭകരീ സാംരാജ്യലക്ഷ്മീപ്രദാ
ചിദ്രൂപീ പരദേവതാ ഭഗവതീ ശ്രീരാജരാജേശ്വരീ ॥ 1॥

അംബാ മോഹിനി ദേവതാ ത്രിഭുവനീ ആനന്ദസംദായിനീ
വാണീ പല്ലവപാണിവേണുമുരലീഗാനപ്രിയാ ലോലിനീ ।
കല്യാണീ ഉഡുരാജബിംബ വദനാ ധൂംരാക്ഷസംഹാരിണീ
ചിദ്രൂപീ പരദേവതാ ഭഗവതീ ശ്രീരാജരാജേശ്വരീ ॥ 2॥

അംബാ നൂപുരരത്നകങ്കണധരീ കേയൂരഹാരാവലീ
ജാതീചമ്പകവൈജയംതിലഹരീ ഗ്രൈവേയകൈരാജിതാ ।
വീണാവേണു വിനോദമണ്ഡിതകരാ വീരാസനേ സംസ്ഥിതാ
ചിദ്രൂപീ പരദേവതാ ഭഗവതീ ശ്രീരാജരാജേശ്വരീ ॥ 3॥

അംബാ രൌദ്രിണി ഭദ്രകാലി ബഗലാ ജ്വാലാമുഖീ വൈഷ്ണവീ
ബ്രഹ്മാണീ ത്രിപുരാന്തകീ സുരനുതാ ദേദീപ്യമാനോജ്വലാ ।
ചാമുണ്ഡാ ശ്രിതരക്ഷപോഷജനനീ ദാക്ഷായണീ വല്ലവീ
ചിദ്രൂപീ പരദേവതാ ഭഗവതീ ശ്രീരാജരാജേശ്വരീ ॥ 4॥

അംബാ ശൂലധനുഃ കശാങ്കുശധരീ അര്‍ധേന്ദുബിംബാധരീ
വാരാഹീമധുകൈടഭപ്രശമനീ വാണീ രമാസേവിതാ ।
മല്ലദ്യാസുരമൂകദൈത്യമഥനീ മാഹേശ്വരീ ചാംബികാ
ചിദ്രൂപീ പരദേവതാ ഭഗവതീ ശ്രീരാജരാജേശ്വരീ ॥ 5॥

അംബാ സൃഷ്ടവിനാശപാലനകരീ ആര്യാ വിസംശോഭിതാ
ഗായത്രീ പ്രണവാക്ഷരാമൃതരസഃ പൂര്‍ണാനുസംധീ കൃതാ ।
ഓങ്കാരീ വിനതാസുതാര്‍ചിതപദാ ഉദ്ദണ്ഡ ദൈത്യാപഹാ
ചിദ്രൂപീ പരദേവതാ ഭഗവതീ ശ്രീരാജരാജേശ്വരീ ॥ 6॥

അംബാ ശാശ്വത ആഗമാദിവിനുതാ ആര്യാ മഹാദേവതാ
യാ ബ്രഹ്മാദിപിപീലികാന്തജനനീ യാ വൈ ജഗന്‍മോഹിനീ ।
യാ പഞ്ചപ്രണവാദിരേഫജനനീ യാ ചിത്കലാ മാലിനീ
ചിദ്രൂപീ പരദേവതാ ഭഗവതീ ശ്രീരാജരാജേശ്വരീ ॥ 7॥

അംബാപാലിതഭക്തരാജദനിശം അംബാഷ്ടകം യഃ പഠേത്
അംബാലോലകടാക്ഷവീക്ഷ ലലിതം ചൈശ്വര്യമവ്യാഹതം ।
അംബാ പാവനമന്ത്രരാജപഠനാദന്തേ ച മോക്ഷപ്രദാ
ചിദ്രൂപീ പരദേവതാ ഭഗവതീ ശ്രീരാജരാജേശ്വരീ ॥ 8॥

॥ ഇതി ശ്രീരാജരാജേശ്വര്യഷ്ടകം സമ്പൂര്‍ണം ॥

***