പാപോത്പാത-വിമോചനായ രുചിരൈശ്വര്യായ മൃത്യുമ്-ജയ
സ്തോത്ര-ധ്യാന-നതി-പ്രദിക്ഷിണ-സപര്യാലോകനാകര്‍ണനേ |
ജിഹ്വാ-ചിത്ത-ശിരോങ്ഘ്രി-ഹസ്ത-നയന-ശ്രോത്രൈരഹം പ്രാര്‍ഥിതോ
മാമാജ്ഞാപയ തന്നിരൂപയ മുഹുര്‍മാമേവ മാ മേऽവചഃ ||41||
ഗാമ്ഭീര്യം പരിഖാ-പദം ഘന-ധൃതിഃ പ്രാകാര ഉദ്യദ്ഗുണ
സ്തോമശ്ചാപ്ത ബലം ഘനേന്ദ്രിയ-ചയോ ദ്വാരാണി ദേഹേ സ്ഥിതഃ |
വിദ്യാ-വസ്തു-സമൃദ്ധിരിത്യഖില-സാമഗ്രീ-സമേതേ സദാ
ദുര്‍ഗാതി-പ്രിയ-ദേവ മാമക-മനോ-ദുര്‍ഗേ നിവാസം കുരു ||42||
മാ ഗച്ഛ ത്വമിതസ്തതോ ഗിരിശ ഭോ മയ്യേവ വാസം കുരു
സ്വാമിന്നാദി കിരാത മാമക-മനഃ കാന്താര-സീമാന്തരേ |
വര്തന്തേ ബഹുശോ മൃഗാ മദ-ജുഷോ മാത്സര്യ-മോഹാദയഃ
താന്‍ ഹത്വാ മൃഗയാ വിനോദ രുചിതാ-ലാഭം ച സമ്പ്രാപ്സ്യസി ||43||
കര-ലഗ്ന മൃഗഃ കരീന്ദ്ര-ഭങ്ഗോ
ഘന ശാര്‍ദൂല-വിഖണ്ഡനോऽസ്ത-ജന്തുഃ |
ഗിരിശോ വിശദാകൃതിശ്ച ചേതഃ
കുഹരേ പഞ്ച മുഖോസ്തി മേ കുതോ ഭീഃ ||44||
ഛന്ദശ്ശാഖി ശിഖാന്വിതൈഃ ദ്വിജ-വരൈഃ സംസേവിതേ ശാശ്വതേ
സൌഖ്യാപാദിനി ഖേദ-ഭേദിനി സുധാ-സാരൈഃ ഫലൈര്‍ദീപിതേ |
ചേതഃ പക്ഷി ശിഖാ-മണേ ത്യജ വൃഥാ സഞ്ചാരം അന്യൈരലം
നിത്യം ശങ്കര-പാദ-പദ്മ-യുഗലീ-നീഡേ വിഹാരം കുരു ||45||
ആകീര്‍ണേ നഖ-രാജി-കാന്തി-വിഭവൈരുദ്യത്-സുധാ-വൈഭവൈഃ
ആധൌതേപി ച പദ്മ-രാഗ-ലലിതേ ഹംസ-വ്രജൈരാശ്രിതേ |
നിത്യം ഭക്തി-വധൂ ഗണൈശ്ച രഹസി സ്വേച്ഛാ-വിഹാരം കുരു
സ്ഥിത്വാ മാനസ-രാജ-ഹംസ ഗിരിജാ നാഥാങ്ഘ്രി-സൌധാന്തരേ ||46||
ശമ്ഭു-ധ്യാന-വസന്ത-സങ്ഗിനി ഹൃദാരാമേ-അഘ-ജീര്‍ണച്ഛദാഃ
സ്രസ്താ ഭക്തി ലതാച്ഛടാ വിലസിതാഃ പുണ്യ-പ്രവാല-ശ്രിതാഃ |
ദീപ്യന്തേ ഗുണ-കോരകാ ജപ-വചഃ പുഷ്പാണി സദ്വാസനാ
ജ്ഞാനാനന്ദ-സുധാ-മരന്ദ-ലഹരീ സംവിത്ഫലാഭ്യുന്നതിഃ ||47||
നിത്യാനന്ദ-രസാലയം സുര-മുനി-സ്വാന്താമ്ബുജാതാശ്രയം
സ്വച്ഛം സദ്ദ്വിജ-സേവിതം കലുഷ-ഹൃത് സദ്വാസനാവിഷ്കൃതം |
ശമ്ഭു-ധ്യാന-സരോവരം വ്രജ മനോ-ഹംസാവതംസ സ്ഥിരം
കിം ക്ഷുദ്രാശ്രയ-പല്വല-ഭ്രമണ-സഞ്ജാത-ശ്രമം പ്രാപ്സ്യസി ||48||
ആനന്ദാമൃത-പൂരിതാ ഹര-പദാംഭോജാലവാലോദ്യതാ
സ്ഥൈര്യോപഘ്നമുപേത്യ ഭക്തി ലതികാ ശാഖോപശാഖാന്വിതാ |
ഉച്ഛൈര്‍മാനസ കായമാന-പടലീമാക്രം യ നിഷ്കല്മഷാ
നിത്യാഭീഷ്ട ഫല-പ്രദാ ഭവതു മേ സത്കര്‍മ സംവര്‍ധിതാ ||49||
സന്ധ്യാരമ്ഭ-വിജൃമ്ഭിതം ശ്രുതി-ശിര സ്ഥാനാന്തരാധിഷ്ഠിതം
സപ്രേമ ഭ്രമരാഭിരാമമസകൃത് സദ്വാസനാ ശോഭിതം |
ഭോഗീന്ദ്രാഭരണം സമസ്ത സുമനഃപൂജ്യം ഗുണാവിഷ്കൃതം
സേവേ ശ്രീഗിരി മല്ലികാര്‍ജുന മഹാ-ലിങ്ഗം ശിവാലിങ്ഗിതം ||50||
ഭൃങ്ഗീച്ഛാ-നടനോത്കടഃ കരി-മദ-ഗ്രാഹീ സ്ഫുരന്‍-
മാധവാഹ്ലാദോ നാദ-യുതോ മഹാസിത-വപുഃ പഞ്ചേഷുണാ ചാദൃതഃ |
സത്പക്ഷസ്സുമനോ-വനേഷു സ പുനഃ സാക്ഷാന്മദീയേ മനോ
രാജീവേ ഭ്രമരാധിപോ വിഹരതാം ശ്രീശൈല-വാസീ വിഭുഃ ||51||
കാരുണ്യാമൃത-വര്‍ഷിണം ഘന-വിപദ്-ഗ്രീഷ്മച്ഛിദാ-കര്‍മഠം
വിദ്യാ-സസ്യ-ഫലോദയായ സുമനസ്സംസേവ്യം ഇച്ഛാകൃതിമ് |
നൃത്യദ്ഭക്ത-മയൂരം അദ്രി-നിലയം ചഞ്ചജ്ജടാ മണ്ഡലം
ശമ്ഭോ വാഞ്ഛതി നീല-കന്ധര സദാ ത്വാം മേ മനശ്ചാതകഃ ||52||
ആകാശേന ശിഖീ സമസ്ത ഫണിനാം നേത്രാ കലാപീ
നതാऽനുഗ്രാഹി പ്രണവോപദേശ നിനദൈഃ കേകീതി യോ ഗീയതേ
ശ്യാമാം ശൈല സമുദ്ഭവാം ഘന-രുചിം ദൃഷ്ട്വാ നടന്തം മുദാ
വേദാന്തോപവനേ വിഹാര-രസികം തം നീല-കണ്ഠം ഭജേ ||53||
സന്ധ്യാ ഘര്മ-ദിനാത്യയോ ഹരി-കരാഘാത-പ്രഭൂതാനക-
ധ്വാനോ വാരിദ ഗര്ജിതം ദിവിഷദാം ദൃഷ്ടിച്ഛടാ ചഞ്ചലാ |
ഭക്താനാം പരിതോഷ ബാഷ്പ വിതതിര്വൃഷ്ടിര്മയൂരീ ശിവാ
യസ്മിന്നുജ്ജ്വല താണ്ഡവം വിജയതേ തം നീല-കണ്ഠം ഭജേ ||54||
ആദ്യായാമിത തേജസേ ശ്രുതി പദൈര്വേദ്യായ സാധ്യായ തേ
വിദ്യാനന്ദ-മയാത്മനേ ത്രി-ജഗതസ്സംരക്ഷണോദ്യോഗിനേ |
ധ്യേയായാഖില യോഗിഭിസ്സുര-ഗണൈര്ഗേയായ മായാവിനേ
സംയക്‍ താണ്ഡവ സമ്ഭ്രമായ ജടിനേ സേയം നതിശ്ശമ്ഭവേ ||55||
നിത്യായ ത്രിഗുണാത്മനേ പുര-ജിതേ കാത്യായനീ ശ്രേയസേ
സത്യായാദി കുടുമ്ബിനേ മുനി-മനഃ പ്രത്യക്ഷ ചിന്മൂര്തയേ |
മായാ സൃഷ്ട ജഗത്ത്രയായ സകലാമ്നായാന്ത സഞ്ചാരിണേ
സായം താണ്ഡവ സമ്ഭ്രമായ ജടിനേ സേയം നതിശ്ശമ്ഭവേ ||56||
നിത്യം സ്വോദര പോഷണായ സകലാനുദ്ദിശ്യ വിത്താശയാ
വ്യര്‍ഥം പര്യടനം കരോമി ഭവതസ്സേവാം ന ജാനേ വിഭോ |
മജ്ജന്മാന്തര പുണ്യ-പാക ബലതസ്ത്വം ശര്വ സര്വാന്തരഃ-
തിഷ്ഠസ്യേവ ഹി തേന വാ പശു-പതേ തേ രക്ഷണീയോऽസ്മ്യഹം ||57||
ഏകോ വാരിജ ബാന്ധവഃ ക്ഷിതി-നഭോ വ്യാപ്തം തമോ-മണ്ഡലം
ഭിത്വാ ലോചന-ഗോചരോപി ഭവതി ത്വം കോടി-സൂര്യ പ്രഭഃ |
വേദ്യഃ കിം ന ഭവസ്യഹോ ഘന-തരം കീദൃങ്-ഭവേന്‍-മത്തമസ്-
തത്സര്വം വ്യപനീയ മേ പശു-പതേ സാക്ഷാത് പ്രസന്നോ ഭവ ||58||
ഹംസഃ പദ്മ-വനം സമിച്ഛതി യഥാ നീലാമ്ബുദം ചാതകഃ
കോകഃ കോക-നദ പ്രിയം പ്രതി-ദിനം ചന്ദ്രം ചകോരസ്തഥാ |
ചേതോ വാഞ്ഛതി മാമകം പശു-പതേ ചിന്മാര്ഗ മൃഗ്യം വിഭോ
ഗൌരീ നാഥ ഭവത്പദാബ്ജ-യുഗലം കൈവല്യ സൌഖ്യ-പ്രദം ||59||
രോധസ്തോയഹൃതഃ ശ്രമേണ പഥികശ്ഛായാം തരോര്വൃഷ്ടിതഃ
ഭീതഃ സ്വസ്ഥ ഗൃഹം ഗൃഹസ്ഥം അതിഥിര്ദീനഃ പ്രഭം ധാര്മികം |
ദീപം സന്തമസാകുലശ്ച ശിഖിനം ശീതാവൃതസ്ത്വം തഥാ
ചേതസ്സര്വ ഭയാപഹം വ്രജ സുഖം ശമ്ഭോഃ പദാമ്ഭോരുഹം ||60||
