ശ്രീകൃഷ്ണജയന്തി പ്രമാണിച്ച് ശ്രീകൃഷ്ണന്റെ പരമ ഭക്തനായ പൂന്താനം നമ്പൂതിരിയുടെ “ജ്ഞാനപ്പാന” യിൽ നിന്നും ഏതാനും ചില വരികൾ:-
കൃഷ്ണ! കൃഷ്ണാ! മുകുന്ദാ ജനാർദ്ദനാ
കൃഷ്ണ! ഗോവിന്ദ നാരായണാ ഹരേ!
അച്യുതാനന്ദ ഗോവിന്ദ മാധവാ!
സച്ചിതാനന്ദ നരായണാ ഹരേ!
ഗുരുനാഥൻ തുണ ചെയ്ക സന്തതം
തിരുനാമങ്ങൾ നാവിന്മേലെപ്പൊഴും
പിരിയാതെയിരിക്കണം നമ്മുടെ
നരജന്മം സപലമാക്കീടുവാൻ.
ഇന്നലെയെന്നോളമെന്തെന്നറിഞ്ഞീലാ-
യിനി നാളെയുമെന്തെന്നറിഞ്ഞീലാ
ഇന്നിക്കണ്ട തടിക്കു വിനാശവു-
മിന്ന നേരമെന്നേതുമറിഞ്ഞീലാ.
കണ്ടുകണ്ടങ്ങിരിക്കും ജനങ്ങളെ
കണ്ടില്ലെന്നു വരുത്തുന്നതും ഭവാൻ,
രണ്ടു നാലു ദിനം കൊണ്ടൊരുത്തനെ
തണ്ടിലേറ്റി നടത്തുന്നതും ഭവാൻ.
മാളികമുകളിലേറിയ മന്നന്റെ
തോളിൽ മാറാപ്പു കേറ്റുന്നതും ഭവാൻ !
*****************************
സ്ഥാനമാനങ്ങൾ ചിന്തിച്ചു ചിന്തിച്ചു
നാണം കെട്ടു നടക്കുന്നിതു ചിലർ!
മദമത്സരം ചിന്തിച്ചു ചിന്തിച്ചു
മതികെട്ടു നടക്കുന്നിതു ചിലർ!
************************
അർഥമെത്ര വളരെയുണ്ടായാലും
തൃപ്തിയാകാ മനസ്സിനൊരു കാലം,
പത്തുകിട്ടിയാൽ നൂറുമതിയെന്നും
ശതമാകിൽ സഹസ്രം മതിയെന്നും
ആയിരം പണം കയ്യിലുണ്ടാകുമ്പോൾ
ആയുതമാകിലാശ്ചര്യമെന്നതും,
ആശയായുള്ള പാശമതിങ്കേന്നു
വേർവിടാതെ കരേറുന്നു മേൽക്കുമേൽ.
**************************
വിദ്യകൊണ്ടറിയേണ്ടതറിയാതെ
വിദ്വാനെന്നു നടിക്കുന്നിതു ചിലർ.
കുങ്കുമത്തിന്റെ ഗന്ധമറിയാതെ
കുങ്കുമം ചുമക്കും പോലെ ഗർദ്ദഭം1.
*********************(1.കഴുത)
കൂടിയല്ല പിറക്കുന്ന നേരത്ത്
കൂടിയല്ല മരിക്കുന്ന നേരത്ത്
മദ്ധ്യേയിങ്ങനെ കാണുന്ന നേരത്ത്
മത്സരിക്കുന്നതെന്തിനു നാം വൃഥാ!
***************************
ഉണ്ണികൃഷ്ണൻ മനസ്സിൽക്കളിക്കുമ്പോൾ
ഉണ്ണികൾ മറ്റു വേണമോ മക്കളായ്?
****************************
പിഴയുണ്ടെങ്കിലും പിഴകേടെന്നാകിലും
തിരുവുള്ളമരുൾക ഭഗവാനേ!
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ