അന്നപൂർണാസ്തോത്രം

 

 അന്നപൂർണാസ്തോത്രം
മന്ദാര-കൽപ-ഹരിചന്ദന-പാരിജാത-
     മധ്യേ ശശാങ്ക-മണിമണ്ഡിത-വേദിസംസ്ഥേ .
അർധേന്ദു-മൗലി-സുലലാട-ഷഡർധനേത്രേ
     ഭിക്ഷാം പ്രദേഹി ഗിരിജേ! ക്ഷുധിതായ മഹ്യം .. 1..

കേയൂര-ഹാര-കടാംഗദ -കർണപൂരേ
     കാഞ്ചീ കലാപ-മണികാന്ത-ലസദ്ദുകൂലേ .
ദുഗ്ധാ-ഽന്നപാത്ര-വര-കാഞ്ചന-ദർവിഹസ്തേ
     ഭിക്ഷാം പ്രദേഹി ഗിരിജേ! ക്ഷുധിതായ മഹ്യം .. 2..

ആലീ-കദംബ-പരിസേവിത-പാർശ്വഭാഗേ
     ശക്രാദിഭി-മുകുലിതാഞ്ജലിഭിഃ പുരസ്താത് .
ദേവി! ത്വദീയ-ചരണൗ ശരണം പ്രപദ്യേ
     ഭിക്ഷാം പ്രദേഹി ഗിരിജേ! ക്ഷുധിതായ മഹ്യം .. 3..

ഗന്ധർവ-ദേവ-ഋഷിനാരദ-കൗശികാഽത്രി
     വ്യാസാ-ഽമ്വരീഷ -കലശോദ്ഭവ -കശ്യപാദ്യാഃ .
ഭക്ത്യാ സ്തുവന്തി നിഗമാഽഽഗമ-സൂക്തമന്ത്രൈ-
     ര്ഭിക്ഷാം പ്രദേഹി ഗിരിജേ! ക്ഷുധിതായ മഹ്യം .. 4..

ലീലാവചാംസി തവ ദേവി! ഋഗാദിവേദാഃ
     സൃഷ്ട്യാദി-കർമരചനാ ഭവദീയ-ചേഷ്ടാ .
ത്വത്തേജസാ ജഗദിദം പ്രതിഭാതി നിത്യം
     ഭിക്ഷാം പ്രദേഹി ഗിരിജേ! ക്ഷുധിതായ മഹ്യം .. 5..

ശബ്ദാത്മികേ ശശികലാഭരണാർധദേഹേ
     ശംഭോരുരസ്ഥല -നികേതന -നിത്യവാസേ .
ദാരിദ്ര്യദുഃഖ-ഭയഹാരിണി കാ ത്വദന്യാ
     ഭിക്ഷാം പ്രദേഹി ഗിരിജേ! ക്ഷുധിതായ മഹ്യം .. 6..

സന്ധ്യാത്രയേ സകല-ഭൂസുര-സേവ്യമാനേ
     സ്വാഹാ സ്വധാമി പിതൃദേവഗണാർതിഹന്ത്രീ .
ജായാഃ സുതാഃ പരിജനാതിഥയോഽന്നകാമാഃ
     ഭിക്ഷാം പ്രദേഹി ഗിരിജേ! ക്ഷുധിതായ മഹ്യം .. 7..

സദ്ഭക്തകൽപലതികേ ഭുവനൈകവന്ദ്യേ
ഭൂതേശ -ഹൃത്കമലമഗ്ന -കുചാഗ്രഭൃംഗേ
കാരുണ്യപൂർണനയനേ കിമുപേക്ഷസേ മാം
ഭിക്ഷാം പ്രദേഹി ഗിരിജേ! ക്ഷുധിതായ മഹ്യം .. 8..

അംബ! ത്വദീയ -ചരണാംബുജസംശ്രയേണ
     വ്രഹ്മാദയോഽപ്യവികലാം ശ്രിയമാശ്രയന്തേ .
തസ്മാദഹം തവ നതോഽസ്മി പദാരവിന്ദം
     ഭിക്ഷാം പ്രദേഹി ഗിരിജേ! ക്ഷുധിതായ മഹ്യം .. 9..

ഏകാഗ്രമൂലനിലയസ്യ മഹേശ്വരസ്യ
     പ്രാണേശ്വരീ പ്രണത-ഭക്തജനായ ശീഘ്രം .
കാമാക്ഷി-രക്ഷിത-ജഗത്-ത്രിതയേഽന്നപൂർണേ!
     ഭിക്ഷാം പ്രദേഹി ഗിരിജേ! ക്ഷുധിതായ മഹ്യം .. 10..

ഭക്ത്യാ പഠന്തി ഗിരിജാ-ദശകം പ്രഭാതേ
     മോക്ഷാർഥിനോ ബഹുജനാഃ പ്രഥിതോഽന്നകാമാഃ .
പ്രീതാ മഹേശവനിതാ ഹിമശൈലകന്യാ
     തേഷാം ദദാതി സുതരാം മനസേപ്സിതാനി .. 11..

ഇതി ശ്രീശങ്കരാചാര്യവിരചിതമന്നപൂർണാസ്തോത്രം സമ്പൂർണം.

***