വടുര്വാ ഗേഹീ വാ യതിരപി ജടീ വാ തദിതരോ
നരോ വാ യഃ കശ്ചിദ്-ഭവതു ഭവ കിം തേന ഭവതി
യദീയം ഹൃത്പദ്മം യദി ഭവദധീനം പശു-പതേ
തദീയസ്ത്വം ശമ്ഭോ ഭവസി ഭവ ഭാരം ച വഹസി 11
ഗുഹായാം ഗേഹേ വാ ബഹിരപി വനേ വാऽദ്രി-ശിഖരേ
ജലേ വാ വഹ്നൌ വാ വസതു വസതേഃ കിം വദ ഫലമ്
സദാ യസ്യൈവാന്തഃകരണമപി ശമ്ഭോ തവ പദേ
സ്ഥിതം ചേദ് യോഗോऽസൌ സ ച പരമ-യോഗീ സ ച സുഖീ 12
അസാരേ സംസാരേ നിജ-ഭജന-ദൂരേ ജഡധിയാ
ഭ്രമന്തം മാമന്ധം പരമ-കൃപയാ പാതുമുചിതമ്
മദന്യഃ കോ ദീനസ്തവ കൃപണ രക്ഷാതി-നിപുണഃ-
ത്വദന്യഃ കോ വാ മേ ത്രി-ജഗതി ശരണ്യഃ പശു-പതേ 13
പ്രഭുസ്ത്വം ദീനാനാം ഖലു പരമ-ബന്ധുഃ പശു-പതേ
പ്രമുഖ്യോऽഹം തേഷാമപി കിമുത ബന്ധുത്വമനയോഃ
ത്വയൈവ ക്ഷന്തവ്യാഃ ശിവ മദപരാധാശ്ച സകലാഃ
പ്രയത്നാത്കര്തവ്യം മദവനമിയം ബന്ധു-സരണിഃ 14
ഉപേക്ഷാ നോ ചേത് കിം ന ഹരസി ഭവദ്ധ്യാന-വിമുഖാം
ദുരാശാ-ഭൂയിഷ്ഠാം വിധി-ലിപിമശക്തോ യദി ഭവാന്‍
ശിരസ്തദ്വൈധാത്രം ന നഖലു സുവൃത്തം പശു-പതേ
കഥം വാ നിര്യത്നം കര-നഖ-മുഖേനൈവ ലുലിതമ് 15
വിരിഞ്ചിര്ദീര്ഘായുര്ഭവതു ഭവതാ തത്പര-ശിരശ്ചതുഷ്കം
സംരക്ഷ്യം സ ഖലു ഭുവി ദൈന്യം ലിഖിതവാന്‍
വിചാരഃ കോ വാ മാം വിശദ-കൃപയാ പാതി ശിവ തേ
കടാക്ഷ-വ്യാപാരഃ സ്വയമപി ച ദീനാവന-പരഃ 16
ഫലാദ്വാ പുണ്യാനാം മയി കരുണയാ വാ ത്വയി വിഭോ
പ്രസന്നേऽപി സ്വാമിന്‍ ഭവദമല-പാദാബ്ജ-യുഗലമ്
കഥം പശ്യേയം മാം സ്ഥഗയതി നമഃ-സമ്ഭ്രമ-ജുഷാം
നിലിമ്പാനാം ശ്രേണിര്നിജ-കനക-മാണിക്യ-മകുടൈഃ 17
ത്വമേകോ ലോകാനാം പരമ-ഫലദോ ദിവ്യ-പദവീം
വഹന്തസ്ത്വന്മൂലാം പുനരപി ഭജന്തേ ഹരി-മുഖാഃ
കിയദ്വാ ദാക്ഷിണ്യം തവ ശിവ മദാശാ ച കിയതീ
കദാ വാ മദ്രക്ഷാം വഹസി കരുണാ-പൂരിത-ദൃശാ 18
ദുരാശാ-ഭൂയിഷ്ഠേ ദുരധിപ-ഗൃഹ-ദ്വാര-ഘടകേ
ദുരന്തേ സംസാരേ ദുരിത-നിലയേ ദുഃഖ ജനകേ
മദായാസം കിം ന വ്യപനയസി കസ്യോപകൃതയേ
വദേയം പ്രീതിശ്ചേത് തവ ശിവ കൃതാര്‍ഥാഃ ഖലു വയം 19
സദാ മോഹാടവ്യാം ചരതി യുവതീനാം കുച-ഗിരൌ
നടത്യാശാ-ശാഖാസ്വടതി ഝടിതി സ്വൈരമഭിതഃ
കപാലിന്‍ ഭിക്ഷോ മേ ഹൃദയ-കപിമത്യന്ത-ചപലം
ദൃഢം ഭക്ത്യാ ബദ്ധ്വാ ശിവ ഭവദധീനം കുരു വിഭോ 20
ധൃതി-സ്തമ്ഭാധാരം ദൃഢ-ഗുണ നിബദ്ധാം സഗമനാം
വിചിത്രാം പദ്മാഢ്യാം പ്രതി-ദിവസ-സന്മാര്‍ഗ-ഘടിതാം
സ്മരാരേ മച്ചേതഃ-സ്ഫുട-പട-കുടീം പ്രാപ്യ വിശദാം
ജയ സ്വാമിന്‍ ശക്ത്യാ സഹ ശിവ ഗണൈസ്സേവിത വിഭോ 21
പ്രലോഭാദ്യൈഃ അര്‍ഥാഹരണ പര-തന്ത്രോ ധനി-ഗൃഹേ
പ്രവേശോദ്യുക്തസ്സന്‍ ഭ്രമതി ബഹുധാ തസ്കര-പതേ
ഇമം ചേതശ്ചോരം കഥമിഹ സഹേ ശങ്കര വിഭോ
തവാധീനം കൃത്വാ മയി നിരപരാധേ കുരു കൃപാമ് 22
കരോമി ത്വത്പൂജാം സപദി സുഖദോ മേ ഭവ വിഭോ
വിധിത്വം വിഷ്ണുത്വമ് ദിശസി ഖലു തസ്യാഃ ഫലമിതി
പുനശ്ച ത്വാം ദ്രഷ്ടും ദിവി ഭുവി വഹന്‍ പക്ഷി-മൃഗതാമ്-
അദൃഷ്ട്വാ തത്ഖേദം കഥമിഹ സഹേ ശങ്കര വിഭോ 23
കദാ വാ കൈലാസേ കനക-മണി-സൌധേ സഹ-ഗണൈഃ-
വസന്‍ ശമ്ഭോരഗ്രേ സ്ഫുട-ഘടിത മൂര്ധാഞ്ജലി-പുടഃ
വിഭോ സാമ്ബ സ്വാമിന്‍ പരമശിവ പാഹീതി നിഗദന്‍
വിധാതൃണാം കല്പാന്‍ ക്ഷണമിവ വിനേഷ്യാമി സുഖതഃ 24
സ്തവൈര്ബ്രഹ്മാദീനാം ജയ-ജയ-വചോഭിഃ നിയമാനാം
ഗണാനാം കേലീഭിഃ മദകല-മഹോക്ഷസ്യ കകുദി
സ്ഥിതം നീല-ഗ്രീവം ത്രി-നയനമ്-ഉമാശ്ലിഷ്ട-വപുഷം
കദാ ത്വാം പശ്യേയം കര-ധൃത-മൃഗം ഖണ്ഡ-പരശുമ് 25
കദാ വാ ത്വാം ദൃഷ്ട്വാ ഗിരിശ തവ ഭവ്യാങ്ഘ്രി-യുഗലം
ഗൃഹീത്വാ ഹസ്താഭ്യാം ശിരസി നയനേ വക്ഷസി വഹന്‍
സമാശ്ലിഷ്യാഘ്രായ സ്ഫുട-ജലജ-ഗന്ധാന്‍ പരിമലാന്‍-
അലഭ്യാം ബ്രഹ്മാദ്യൈഃ മുദമനുഭവിഷ്യാമി ഹൃദയേ 26
കരസ്ഥേ ഹേമാദ്രൌ ഗിരിശ നികടസ്ഥേ ധന-പതൌ
ഗൃഹസ്ഥേ സ്വര്ഭൂജാऽമര-സുരഭി-ചിന്താമണി-ഗണേ
ശിരസ്ഥേ ശീതാംശൌ ചരണ-യുഗലസ്ഥേ-അഖില ശുഭേ
കമര്ഥം ദാസ്യേऽഹം ഭവതു ഭവദര്ഥം മമ മനഃ 27
സാരൂപ്യം തവ പൂജനേ ശിവ മഹാ-ദേവേതി സങ്കീര്തനേ
സാമീപ്യം ശിവ ഭക്തി-ധുര്യ-ജനതാ-സാങ്ഗത്യ-സമ്ഭാഷണേ
സാലോക്യം ച ചരാചരാത്മക തനു-ധ്യാനേ ഭവാനീ-പതേ
സായുജ്യം മമ സിദ്ധിമത്ര ഭവതി സ്വാമിന്‍ കൃതാര്ഥോസ്മ്യഹമ് 28
ത്വത്പാദാമ്ബുജമര്ചയാമി പരമം ത്വാം ചിന്തയാമ്യന്വഹം
ത്വാമീശം ശരണം വ്രജാമി വചസാ ത്വാമേവ യാചേ വിഭോ
വീക്ഷാം മേ ദിശ ചാക്ഷുഷീം സകരുണാം ദിവ്യൈശ്ചിരം പ്രാര്ഥിതാം
ശമ്ഭോ ലോക-ഗുരോ മദീയ-മനസഃ സൌഖ്യോപദേശം കുരു 29
വസ്ത്രോദ്ധൂത വിധൌ സഹസ്ര-കരതാ പുഷ്പാര്ചനേ വിഷ്ണുതാ
ഗന്ധേ ഗന്ധ-വഹാത്മതാऽന്ന-പചനേ ബഹിര്മുഖാധ്യക്ഷതാ
പാത്രേ കാഞ്ചന-ഗര്ഭതാസ്തി മയി ചേദ് ബാലേന്ദു ചൂഡാ-മണേ
ശുശ്രൂഷാം കരവാണി തേ പശു-പതേ സ്വാമിന്‍ ത്രി-ലോകീ-ഗുരോ 30
നാലം വാ പരമോപകാരകമിദം ത്വേകം പശൂനാം പതേ
പശ്യന്‍ കുക്ഷി-ഗതാന്‍ ചരാചര-ഗണാന്‍ ബാഹ്യ-സ്ഥിതാന്‍ രക്ഷിതും
സര്വാമര്‍ത്യ-പലായനൌഷധം അതി-ജ്വാലാ-കരം ഭീ-കരം
നിക്ഷിപ്തം ഗരലം ഗലേ ന ഗലിതം നോദ്ഗീര്‍ണമേവ-ത്വയാ 31
ജ്വാലോഗ്രസ്സകലാമരാതി-ഭയദഃ ക്ഷ്വേലഃ കഥം വാ ത്വയാ
ദൃഷ്ടഃ കിം ച കരേ ധൃതഃ കര-തലേ കിം പക്വ ജംബൂഫലം
ജിഹ്വായാം നിഹിതശ്ച സിദ്ധ-ഘുടികാ വാ കണ്ഠ-ദേശേ ഭൃതഃ
കിം തേ നീല-മണിര്വിഭൂഷണമയം ശംഭോ മഹാത്മന്‍ വദ 32
നാലം വാ സകൃദേവ ദേവ ഭവതസ്സേവാ നതിര്വാ നുതിഃ
പൂജാ വാ സ്മരണം കഥാ-ശ്രവണമപ്യാലോകനം മാദൃശാം
സ്വാമിന്നസ്ഥിര-ദേവതാനുസരണായാസേന കിം ലഭ്യതേ
കാ വാ മുക്തിരിതഃ കുതോ ഭവതി ചേത് കിം പ്രാര്‍ഥനീയം തദാ 33
കിം ബ്രൂമസ്തവ സാഹസം പശു-പതേ കസ്യാസ്തി ശംഭോ
ഭവദ്ധൈര്യം ചേദൃശമാത്മനഃ സ്ഥിതിരിയം ചാന്യൈഃ കഥം ലഭ്യതേ
ഭ്രശ്യദ്ദേവ-ഗണം ത്രസന്മുനി-ഗണം നശ്യത്പ്രപഞ്ചം ലയം
പശ്യന്നിര്‍ഭയ ഏക ഏവ വിഹരത്യാനന്ദ-സാന്ദ്രോ ഭവാന്‍ 34
യോഗ-ക്ഷേമ-ധുരംധരസ്യ സകലഃശ്രേയഃ പ്രദോദ്യോഗിനോ
ദൃഷ്ടാദൃഷ്ട-മതോപദേശ-കൃതിനോ ബാഹ്യാന്തര-വ്യാപിനഃ
സര്വജ്ഞസ്യ ദയാ-കരസ്യ ഭവതഃ കിം വേദിതവ്യം മയാ
ശംഭോത്വം പരമാന്തരങ്ഗ ഇതി മേ ചിത്തേ സ്മരാമ്യന്വഹം 35
ഭക്തോ ഭക്തി-ഗുണാവൃതേ മുദമൃതാ-പൂര്‍ണേ പ്രസന്നേ മനഃ
കുംഭേ സാംബ തവാങ്ഘ്രി-പല്ലവ യുഗം സംസ്ഥാപ്യ സംവിത്ഫലം
സത്ത്വം മന്ത്രമുദീരയന്നിജ ശരീരാഗാര ശുദ്ധിം വഹന്‍
പുണ്യാഹം പ്രകടീ കരോമി രുചിരം കല്യാണമാപാദയന്‍ 36
ആമ്നായാമ്ബുധിമാദരേണ സുമനസ്സങ്ഘാഃ-സമുദ്യന്മനോ
മന്ഥാനം ദൃഢ ഭക്തി-രജ്ജു-സഹിതം കൃത്വാ മഥിത്വാ തതഃ
സോമം കല്പ-തരും സുപര്വ-സുരഭിം ചിന്താ-മണിം ധീമതാം
നിത്യാനന്ദ-സുധാം നിരന്തര-രമാ-സൌഭാഗ്യമാതന്വതേ 37
പ്രാക്പുണ്യാചല-മാര്‍ഗ -ദര്‍ശിത-സുധാ-മൂര്‍തി പ്രസന്നശ്ശിവഃ
സോമസ്സദ്-ഗുണ-സേവിതോ മൃഗ-ധരഃ പൂര്‍ണാസ്തമോ മോചകഃ
ചേതഃ പുഷ്കര ലക്ഷിതോ ഭവതി ചേദാനന്ദ-പാഥോ നിധിഃ
പ്രാഗല്ഭ്യേന വിജൃമ്ഭതേ സുമനസാം വൃത്തിസ്തദാ ജായതേ 38
ധര്‍മോ മേ ചതുരങ്ഘ്രികഃ സുചരിതഃ പാപം വിനാശം ഗതം
കാമ-ക്രോധ-മദാദയോ വിഗലിതാഃ കാലാഃ സുഖാവിഷ്കൃതാഃ
ജ്ഞാനാനന്ദ-മഹൌഷധിഃ സുഫലിതാ കൈവല്യ നാഥേ സദാ
മാന്യേ മാനസ-പുണ്ഡരീക-നഗരേ രാജാവതംസേ സ്ഥിതേ 39
ധീ-യന്ത്രേണ വചോ-ഘടേന കവിതാ-കുല്യോപകുല്യാക്രമൈഃ-
ആനീതൈശ്ച സദാശിവസ്യ ചരിതാമ്ഭോരാശി-ദിവ്യാമൃതൈഃ
ഹൃത്കേദാര-യുതാശ്ച ഭക്തി-കലമാഃ സാഫല്യമാതന്വതേ
ദുര്‍ഭിക്ഷാന്മമ സേവകസ്യ ഭഗവന്‍ വിശ്വേശ ഭീതിഃ കുതഃ 40
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ