ശനീശ്വര ചരിതം 4
ദേവേന്ദ്രനെ ശനി ബാധിച്ച കഥ
ഒരിക്കൽ ദേവലോകത്ത് എത്തിയ ശനിയോട് ദേവേന്ദ്രൻ കുറച്ച് അഹന്തയോടെ ഇങ്ങനെ പറഞ്ഞു.
" ശനിഗ്രഹാധിപതിയേ, നീ എല്ലാവരെയും പരീക്ഷിക്കുന്ന വലിയ നീതിമാനെല്ലെ? എന്നാൽ ദേവന്മാരുടെ രാജാവായ എൻ്റടുത്ത് നിൻ്റെ ബാധയൊന്നും വിലപ്പോവില്ല, എന്നെ ശനി ദോഷങ്ങളൊന്നും ബാധിക്കില്ല!
ൻ്റെ ജാതകത്തിൽ അങ്ങിനെയൊരു ദശ നീയായിട്ടു വരുത്തിവക്കുകയും വേണ്ട കേട്ടോ!"
ഇതെല്ലാം കേട്ട ശനി ദേവേന്ദ്രനെ നോക്കി പറഞ്ഞു:
"രാജാവായാലും കൊള്ളാം, പ്രജയായാലും കൊള്ളാം. അനുഭവിക്കേണ്ടത് അനുഭവിച്ചു തീർക്കുക തന്നെ വേണം. ഞാനായിട്ടു ഒന്നും ചെയ്തില്ലെങ്കിലും വരും ഓരോ ദശ , വന്ന പോൽ പോകും. അതെല്ലാം ഓരോരുത്തരുടെ കർമ്മഫലമാണ്.
ഉടൻ ദേവേന്ദ്രൻ പ്രതികരിച്ചു.
"ഹേ,ശനീ, നീ വലിയ കണിശക്കാരനല്ലെ എങ്കിൽ പറയൂ എൻ്റെ ജാതകത്തിൽ ശനിദശ എപ്പോഴാണ്?"
ദേവരാജ ൻ്റെ ജാതകം നോക്കി ശനിദശക്കാലം കൃത്യമായി ശനി പറഞ്ഞു കൊടുക്കുകയും ചെയ്തു.
കാലം കടന്നു പോയി ശനി പറഞ്ഞ സമയം വന്നപ്പോൾ ദേവേന്ദ്രൻ ഒരു കാര്യം ഉറപ്പിച്ചു.
എന്തു വന്നാലും ശനിക്ക് പിടികൊടുക്കാൻ അവസരമുണ്ടാക്കരുത്. എന്തെങ്കിലും ഉപായം കണ്ടു പിടിച്ചേ പറ്റു. പിന്നെ ഒട്ടും താമസിച്ചില്ല.
ദേവേന്ദ്രൻ തൻ്റെ തനതു രൂപം ഉപേക്ഷിച്ച് ഒരു മുഷിക രൂപം സ്വീകരിക്കുകയും ആരെയും അറിയിക്കാതെ രഹസ്യമായി ഒരു കുപ്പയിൽ' ഒളിക്കുകയും ചെയ്തു!
ഈ രൂപത്തിൽ ശനി എന്നെ ബാധിക്കുന്നത് ഒന്ന് കാണട്ടെ എന്ന അഹംഭാവത്തിൽ കുപ്പത്തൊട്ടിയിൽ ശനി പറഞ്ഞ കാലമത്രയും കഴിഞ്ഞപ്പോൾ പെരുച്ചാഴി വേഷം ഉപേക്ഷിച്ച് ദേവലോകത്ത് ഇന്ദ്രനായി തന്നെ വന്നു ചേർന്നു.
പിന്നീട് ഒരു ദിവസം ശനിയെ കണ്ടപ്പോൾ പുച്ഛത്തോടെയും എന്നാൽ വിജയ ഭാവത്തോടെയും ശനിയെ പറ്റിച്ച കാര്യം ദേവേന്ദ്രൻ ശനിയെ ഓർമ്മിപ്പിച്ചു.
അപ്പോൾ ശനി ശാന്തഭാവത്തിൽ പറഞ്ഞു..
"സ്വർഗ്ഗ ലോകത്ത് സർവ്വരാലും ആരാധ്യനായി കഴിയേണ്ട അങ്ങ് ശനിദശക്കാലം എവിടെയായിരുന്നുവെന്ന് അങ്ങ് തന്നെ ഓർത്താൽ മതി.
അങ്ങയെ ഈ വേഷം കെട്ടിച്ചതും അങ്ങിനെ തോന്നാൻ ഇടയാക്കിയതും ആരായിരിക്കുമെന്നു കൂടി ചിന്തിച്ചോളു.
അതെ എവിടെ പോയി ഒളിച്ചാലും ആർക്കും ശനി ബാധയെ തടുക്കാനാവില്ല
ആൾ എത്ര സമർത്ഥനായാലും ഏത് അധികാരി ആയാലും ശനി പിടിക്കേണ്ട സമയത്ത് ശനി പിടികൂടും തീർച്ചയാണ്.
അതാണ് ശനി .സാക്ഷാൽ ശനീശ്വരൻ.
ഓം ശ്രീ ശനീശ്വരായനമഃ
Curtesy: Aravind Nair
***
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ